ნინას, ნამუს ბრაგადანქჷნ,
გურწყურგილშე ეშმაფუნცჷ,
კინოხონიშ კინჷნაჩველი -
აშო წკონდათ ეშმაპუნცჷ.
ნათქუელ რე, ნარგის წყარი
ვალუბიდა ვაფალუნცჷ,
ნინაშ მაწყარალი მი რე -
ქიმშანთხაფენ მარგალ ლურცჷ?
ნინა ჩქინი ღმალა რე დო
მუკულუათ მარგალურცჷ,
ნქირაშ შარას გიორე დო
უკულ, შურო მი თვალუნცჷ?!
29.05.2012წ. ზუგდიდი
გინმოლუ დო მითმედინუ
არძაშ უსკვამაში ნინა,
კინოხ ირ კოც ოპეკუდჷნ
ასე მითინც ვანარღ ინა.
დიხაუჩაშ რთაფაშ ხან უღ,
მუშ ვაჸოფე გინმაჯინე,
იშენ სქუალეფიშ ჯარ უღ -
ორწყე ბრელ ხანს ვაგარზინე.
შურეშმალუს წირსპალ ვაჸუნც,
მითინ ვაპალ ალმარინე,
ახალეფიშ ზისხერ ვაფუნც -
გურც აჭუ დო ანგარინე…
მუშენ ოკო დინუდასჷ,
ჩქინ სკვამ ნინა, გოსოფური,
მარგალს თენა ვაგინდასჷნ …
თექ რე გვალო გოსოფუ̂ გური!
14.09.2011წ. ზუგდიდი
ზისხერჲ ირო მუშის ორთუ,
გოგაღარით ლაზეფე!
თქვან ჸოროფაქ გურჲ შკას გომრთუ,
გოგაღარით ლაზეფე!
ჩილამურით ემაფშუ თოლქუ,
გოგაღარით ლაზეფე!
მარგალი-ლაზი მიქ რე გორთუ?
გოგაღარით ლაზეფე!
გოკონჲ შონი დო გოკონჲ ქორთუ
ართ ვორეთჷ ლაზეფე!
ზუგდიდი. 08.30.2011
ო, მის ოკო, მუშო ოკო,
რინა ათეშნერჲ,
ართ მოურს, მაჟიაშო
ხამ რე ლასირელჲ.
ჩქინჲ ბედი ქოიჩქუდას
უგურჩქინუ დიო,
თე ქიანას გორჩქინას
მიკორნუანდიო?!
ზღვაშ ფერი გიღუ თოლეფი დო, სით ქოგუქუ ზღვას,
ვეშემცოდილუანქუ დო მიდაჸუნუქ შხვას,
მივოტალენქ ირს გიშულირს, ვართ ფხონუ დო ფთას,
გეგნობჩურუნქ მა პოპორელი ჭოროხის დო ტკვარს,
დაჩხირს მეფჩანქ სქან მილარნალს, სქან ჸოროფას ქარს,
დოიჸვილუნქ სქან ქომონც დო, წყარს ქიმეფჩანქ მალს …
ზღვაშ ფერი გიღუ თოლეფი დო, სით ქოგუქუ ზღვას.
13.05.2011 ზუგდიდი
ირით შულადირს, ონატრებელო ღურაქ დჷმოსქიდ,
რახან მათხირო გინორთელე ასე კოჩანა,
რახან ირფელ ჯგირ თე უკოჩობაშ კათეფს რენ ოსქიდ,
რახან გურ ქოჩენ, მუკკართუნა ლაბანს ქორჩანა,
რახან ვალალეფს ჟინოსქუაშ პატი ქიგედვეს,
რახან ტოლოფით აკოწიკვე მუთ ქორდჷნ წკონდა,
რახან კოჩანაშ ჯოხო ამდღა, ჩიჩიეფს გედვეს,
რახან კობუებქ გამკაჸათეს მუთ ქორდჷნ მონდა,
რახან ქუალეფს ოჸოთანა გამწაშე წირდეს,
რახან ურჩქენდეფ უნჩაშენა ქიჸანას ეფას,
რახან სიმართეს სიბორუეშ მარწკინდი დირგეს,
რახან გურს წირკე გამოთხოზაფ ჸოროფათ ეფშას.
თაშნე შულადირს თე ქიჸანაშე ქომისხუნ იმნტე,
მარა ჸოროფილს მა ხვათახვალე თაქ მუჭო დიბტე?!
05.05.2011 ზუგდიდი
ქირსექ გენათჷ! – ჰამენია -
კინოხჷ უგამ შურტიბ მარგალს!
ქირსე ჟინცას მიანჭჷდ დო
თოლ მეთხოზჷდ თიში ვარვალს…
წკონდა გური მარდით ეფშა,
ირო ჸოფე მარგალიში,
ხვამელ ჸოფე, ათეშ გეშა
ნტერს ონჯარჷდ ძალამ თიში…
გჷნაქირსიანეფ ვორეთ
სიმონიშ დო ანდრიაში,
თეცალ მარდი ძალამს მონჭელს
ჩქინ ქიანას ანწ მი აში?
ვემერკებდას ჭყოლოფუა
ღორონთიშ მარდ მიდგას გალენ,
უმულას რდას მეხვამუა -
ქირსექ გენათ! – ჰამენ, ჰამენ!
24.04.2011წ. ზუგდიდი
