ჩქიმი კახათი

ჩქიმ ბები მარგო, მა დო ჩქიმ ნათილია – მაქსიმე

მუჭოთ ზღუას გელაფირ ბოთილს ვაკითხენს პოპორი, სო კინაჸათანს დო ნამ კირდეს მიკარაგუანს თისინ, თეშ ვართ მა მოკითხჷ ჩქიმ მუზეფი, სოჸურეშე, სო გინმოჸოთანსინ თის. ქუმმანჯირუ დო უკულ თიშ ხეს ვორექ ედომშამო… თუდო გებდვანქ ლერსისინ, მეტ ხან ვარე მუთ ბჭარინ. დუდშე, ჩქიმ ჸუდეს, ირ ოჭმარეს ბაღრეფიშ ჭურჭულ მოკურცხინუანდჷ გოთანაშა დო მათ ხიოლით მივარჩქილედინ, ათეს ეთმობჭარუნდი ლერსის… მუქუთ გიშართუნ დო სო გინობლინ, თინა რე, ნამდა ფაქტობურო დიაჩქიმიშ სოფელს ეთნობხანტუექ გურუგუჩამუო დო უნელო, ბაღანობაშ შვენაშა კინორთელქ, ჩქიმ მარდუალ ბებ დო ბაბუშ ოფუტე კახათის გეშუოჭოფე დუდი… ვამნარღენქ 🙂

დიაჩქიმს ქოვუკითხი ლერსი, ჭარუა დო ხათე, ჩილამურეფქ ქელაჸუნჷ თოლშა დო გურშა ქიმკიბხუტოლე მათ ეკანკალაფირქ… უკული, კახათშა დინიბლი დო ბების ხოლო წოვუკითხი თე ლერსი. რეაქცია რდჷ თოისერი – მუდგარენ შურქანაქალა, უჭყანიე ჩქიჩქუშ ეკონგარინიშნერ ხონარქ გეკუოლ ხათე პიჯიშე დო ჩილამურეფქ ქელათხოზჷ ღვანწკეფს. გურქ ქიმმაწკიტონჷ. ქუვახუტოლი დო გობჯუნი ანგარაფილქ მა ხოლო. მუშენინ, ლერსის წეკითხენთინ უკულ თექ ქიმეხვადუთ…

კახათი

ცირაშორო გელუხვიჩონდ ჩე გოთანას ღვაქ დო
ჟინცაშ შქაგურს ამანწკარილ ზიტყვეფ გეგმიბღ გიმე…
ჸუდეშ ხოლოს, ოდაფეშე, ბაღრე იბირს თაქ დო
მივარჩქილექ მა თიშ ჭურჭულს – ხონარ ვეკმაღინე…

ბჟა კარკაცანს. ოპეულეს ცუნდი მინმადინ დო
ელმებძიცა, მინვოჯღონა ირკოჩიშა ხვამას…
ოლაფარეს ალედიარს ჭარჭულია გინ დო
მირულენა წიწილეფი, ჸვინთელეფი, სქვამას…

ბების ხიოლ აწალაჸაფ, აწმაზადუ მოთას,
ღვალეფს გეჭარ კარაკანო მუზმა წანაშ ჭუა.
(მეჭეჭეფი თიქ მიდინუ, სუმშა თუთაშ მორთას),
გაჭყორდუნო, ახალობას გიწნალეფი სქუა…

მა კახათიშ ნარდ კოჩ ვორექ, თაქ დიბგურე ჭკუა,
(მუზმა ღორჯო ალამჭოფაფ წყარმალ უჩა ღალუს…),
ბაღანობას ჩქიმ ხიოლეფს თაქ აჩანუდ ფსუა.
თაქ ჸოროფაქ ენმათასუნ, ოდღამუშეთ ფალუნს…

2015 წ.

* * *

11152687_826017747448153_7241923812169316131_n

კირდეს ცაცის გილვორექ დო გინვოჯინექ ჯალონს,
თუდო წყარმალს გვერ ქიმეთხოზ მორდილ წვერენტიას…
ე გურ ხოლო ჯოღორცალო გარზე რე დო ლალუნს,
ჸალაცალო მიოჯინე გიწნაჸოთემ თიას…

ჯუმწყარპიჯის, მუკი-მუკი მოპეულე გვართა
დიხაშ კარკაც- ქამენიეფ ასქვამანა არანს…
ჩქიმ ფირქეფი სქან ჸოროფას დო გოშინას გართანს.
ვაგარკებუ ჩქიმდა ჭუაქ მაწყარმალუ ფარანს…

წვანე ხიოლ აკიბწყორი ლენფერ ხიოლწკუმა,
დოლო ნოხო ქათიბრჩი დო ცას თოლ ქოვოჸუნე.
ჟი მინჭუაფ ჩქიმი შური- თე თანთალა კუმა,
ირფელ ართო გიბჭყოლიდე მუთ სი გურ მიწყუნე…

გეგშაბჩოლე ჩქიმ რსხულიშე ირნერ კორინ ფური,
შურუბუმო ქაშაბდოხოდ თოლწკურილო ართ ხანს.
დებჸანი დო ჟი სირჩქალაშ ჰეერ ქიმნიფქუნი.
ჟი მუნაფა გიმოციზანს, მარდის გიმოფართხანს…

იქაქალუ მასქური დო ფიჟვის წვანეთ ღაფუნს.
ბგინაფულე მუდგარენნერ მონძალაფირ ტიბუს…
ორთა ორე ჩქიმ მაჸალე, მუ ელაზიმ აფუნს!
ორთა ურთანს ჩქიმ დღალეფიშ მათელებერ სქიბუს…

* * *

11781757_1016670398366115_5554034333276753212_n

მინუოჯანუქ როხოია ქუალეფს დო
კუჩხეფს ჩქიმ მარდუალ ჯუმწყარ მილუანს.
ციტუეფი მიციტონუანა კითეფს დო მახიცინუაფჷ,
ითამ სუმ ვოლტიან ელემენტის ნინას მიკმუწაწუანდე…

ჟი მუნმოქუნს ვერწემი დო ფსქელი, ლენფერ ხიოლი- ცა.
თუთა ჩელაია, მუნაფა მილაგუჯაფილ გინი –
ორთუმელო მემიძჷ დუდშა დო მაწკურუ თოლეფი…

ჩქიმ გაღაშე ეშულირ ფირქეფს, ფარფალიეფო გინორთელს,
მაჭირხოლეფი გილათხოზუნა ოშა-გოშათ დო კიკონუნა.
ჩქიმ მასქილიდაფარ დო ჭუაგუმარკებელეფ რენა ასე თენეფი…

ბჟაშამეჭოფაფილ ჩქიმ გურუ- გური გუგულიშ ხონარშა
მანტრას მიმაჟირანს ათაშ: გუ-გუ, გი-გა, გუ-გუ, გი-გა…
ჩქიმ შურიშ ღალას ვოკვირუქ დო ბგინაფულენქ,
მუჭო ვარსხუაფუქ უგუთებუ ორთას,
მუჭო გინმიფრთუთ ართ ასა-გასათ დო
გეპუნქ მეშხურეშ შარას, ირიათონშა მალუს.
დიადიხაშე ეკობუნაფილ შვენა იწკონდარებჷ.
ბორჯი დო ოფირჩა დინუ…

მურიცხეფგუმაჭყაფუ ნირსონაშ მიარეფერუან ოწონდე
სქან ამნახანტო მაძირუაფჷ
(ითამ “ნასა”-ქ გინიღუკო “ჰაბლი”-შ ტელესკოპით),
გოძიცელ, ჸოროფათ ეფშა თოლეფით,
უმუსოფუო ენმოჯინედი თიმ სერს, ჯუქურონ დო
შურიშ ჸუნაფაშახ მახინარენდუნ…

ჩხონაფა ხოლო თენა რდას ოკო,
მემჩქუნ, მარა…
ბკურცხუქ დო ხვალე „ბიმიშ“ ქეთელს იბრჩქილექ გამწაშე,
ხასჷლას ალნობჯანუე თელ თე მოძირაფაშვანინ…

* * *

meditation_472_312_80

მინდორიას, ჭყენჭყიწკუმა, ოჩაიეშ მოფერდას,
სოდეთ ირ ონჯუას ალუვოხექ დო ვმედიტირენქინ,
ლანჯიშ ჸას გილმადოხოდუ ართ ჩიტი დო
ჯაბიერო ღურჭულანს მუშო
გურალაჭვილიშ ხონარით…

მუზმა ჭუა დო ნგარა გიშერჩქილე ასე თიშ ხონარს,
მუზმა ნარღი დო მენდიშ წაულა…
თოისერი რე რინა,
ამარდე ხომ შხვანერო მაძირუაფუდჷ ირფელი –
თიშ ღურჭულს ვარდუო
შურს ვოჸუნუანდი ხიოლიშ გეშან?..

ჩქინ მუკი-მუკი ირფელი
ჩქინ გაღაშ პროექცია რე ხვალე დო შხვა მუთა…
ჩართი სქან დინახალეიან ეკრანი,
ითამ კომპიუტერ რდას დო
ჭარი სქან ბედინერ რინაშ პროგრამეფი,
თირე ვიშო-აშო სქან შურიშ “მაუსით”
სოლეთ გისხუნუნ დო იხარი სქან აკნაქიმინა თელარათ…

სქან გალე ირო ოჭიშიშ რთინაფა რე,
სქან გალე ირო გურჭუა რე დო ჩილამურეფი…
ქენიხვე ედომშამო სქან დუდიშ ინოხ დო
ოლაჸაფინე რინა სქან კორინშა,
ითამ ბაღანობას იშინანდე დო
“მარიოს” ლაჸაფენდე…

* * *

miss-you-53

ჩქიმ ასა-გასა ვარე ჩქიმ ჯინჯ ჸუდე,
ვართ დიადიხა დო ვართ მურიცხეფი…
ჩქიმ ჯინჯ ჸუდე ფოტონი რე ბჟაშ გურშე ეშახარცქილი
კოსმიურ ნჭუაფათ გიმულირ თე პლანეტაშა
ახვალამირ დო აზადაფილ სქან ფოტონს,
სოდეთ გინიფხორი ირიათონონ დო წორო
ვასინთორენდით უკმელა აკანს
სოდგა ვანჭუდითინ…ჩქინ ბარჩხალი უგუთებუ რე,
უშქირატ დო ხეუმუთხუმუ…

ჩქიმ გინაფა ჩქიმ რსხულს ვენტირე დო
გინმოწენს ტანშე მუჭოთ კვარწახი ჩუანშე
დიაჩქიმ გითმიოზადანდჷ სუმკუჩხისინ…

ჰალამო ართონობა აკმოცენს დო ირთუ ჩქინ შარეფი…
სი ასე ალბეთ სატურნის გამკაჩირთი დო
მინჭუაფუქ გორქიულო წკურუმს
დო ჸოროფამ სინთეს ურთუნქ ირფელს სქან მუკი-მუკი,
მუჭოთ მა ართშა, წორო ვორდითინ…

მა დიხას ქუდოფსქიდი, ქაშმელუ ჭყანაქ,
დიოუგინაფ ტომბა ჯაბით ეთმივფშაფუქ დო
ფშქირტუქ-
მორკუქ გახანგებაშა!

* * *

man_sitting_and_watching_sunset-other

ეჩდოჩხორო დღა რე
მა დო ართ ქუაქ დევმაჸალითინ…
ათაშ
ქომოვურქ ხვალე
ქომიპონანქ ჩქიმ ასა-გასას დო
თე ქუას ქოგივოხუნუანქინ
მა გიშმურქ უკულ თიშე
ბჟას ქალუდირთუქ დო ვოკვირუთ წორო
პრობლემეფშე დო გურჭუეფეშე დიჭყანს
კვაკვალს ართ მაფსკაიაწკუმა
ამარ ტყარ პეულეფშე
ნექტარს ეშმაკოროფუნს გორქიულონ
მა დო ბჟა ვუჯინეთ თის
თოლს ვა ვუთხინუანთ დო მაძიცინენა
მიჩქუნა
დირძღუ ჯაბიშ დო ჭუეფიშ ჩილამურო გიმობუნათ
ნარღებეფით დუდს გინოხვალამირეფიშ გეშა
გიჩოლუ
გიჩოლუ ირფელნერ გინაფეფშე დო
გოკარკაცანს
ოწონდეს ელანჯირელ ურთას ხვამას ქიმუჯღონანს დო
მიდურს ჸუჩა დორჩქალაფირი
მუთუნ ვარშენ ხიოლით დო მენდით ეფშა
მიჩქუნა
მიჩქუნა თენა ირფელი…
თოთმაცეფი ვორეთ მა დო ბჟა
ათაშ გიშმაფწვართუნთ თე კოჩის დო
რინას ვოგურუანთ…

* * *

ჩქიმ შხვაშხეთეკნაგეფი დუდი გაკობპელეტე ამდღა,
ფია-ფიათ აკუვორღვი ჩქიმ ჯერღვი დო ძელი.
გაკობტახი ჸვილეფი, აკმადგინალი ჩქიმ ასა-გასაშ,
გაკობფაჩი დო გაკუვორღვი ირფელი, მუდგა მა ვორდინ…
ასე ვოხექ დო აკმუვონწყუნქ ჩქიმ დუდს, კინ ჩქიმ ხელეფით.
ჩქიმ დუდს ბგურაფულენქ ათაშ, მაჸალეცალო
ტელევიზორს ხუნდჷ ირ დღას დო კინ აკმანწყუნდჷ უკულინ…
აკოგაფაშვანს ბრელ ნოწილიშ გიშარღვაფა მიხვადუ –
ურწუმობაშ, უმენდობაშ, ორჩანუეფიშ, უჸოროფუობაშ.
გიშმუვორღვანქ ირ ნეგატივს დო ირ ფურს, ინოხ ინომრენ…
კილ-კილშა ვამორსენქ ჩქიმ ირ გინაფას დო იბთხინუანქ
მუმალასარ დო მუმაჯილიკარ შქურინეფს, უგურობას…
გინმიბრთუქ კინ თით, მით გორჩქინაშახ ვორდინ,
სონდარო დიადიხას მიწინდესკო მი ვორექინ…
მა ივაბრანქ – „სი რექ“-ის!
მა იბჩიებუქ – „მა ვორექ“!..

* * *

Ashampoo_Snap_2015.07.10_17h47m40s_001_

მა თი თონწყუ ვორექ, მემჩქუნ,
ნამუთ ბრელ ხანიშ კინოხ
ღორონთს ჩართულო ალასქიდჷ ოჭმარეს
თოლიშ ქაქაბიშან დო მუს ხოლო ვაუჩქ ასე,
მუშ ართუაფალო დოდგუმილ სპექტაკლის,
ნამუსუთ ხვალახე კოჩიშ როლს ბლაჸაფენქინ,
უმინჯურო დო უმაჯინეთ,
ტყურელო გიფსოფუქ სცენასინ.
ჩქიმ სცენა, ჩქიმ ჭიჭე გური რე, ჟირო გორთილი,
ხიოლ დო ჭუაშ უჩა და ლენფერ ფარდეფით,
ბორჯგიშაშქუმალირო თირანა ართმაჟიასინ…
ჩქიმ ჸუმენიშ მაჸვილარ,
დიადიხაშ შურდგუმილეფშა გიმაჯინე
სქან თოლეფშე გიმაჭვალირ ჩილამურეფი რე,
ჯიმუამი, წყითე, მარა იშენ, ჰამო,
მუჭოთ ლაკაციაშ პეულეფშე ეშნანაკვერა
ნექტარით აკნაზადა თოფური…
ვო ღორონთი, დიხვამ სქან თოლეფიშ პლაზმურ ეკრანქ,
ამდღა ჩქიმ ერჩქინაშ დღა რე.
ქოქიმინი ჯგირობუა დო დოშქირიტი თე გეძირაფა!
ვარ-და დუმორთინე კინ რეალურ რინაშა,
ნამუთ უმოს ჭუეფით ქორე ეფშა,
მორო მაჩქვენუ ქოვარა,
მიშო ბლაჸაფენქ თე კონწარ როლსუნ!

* * *

NCOS7200

ჟინ ორთას ქელუოძახი ქიმმეხვარუკონ,
გაგმომიჯღონუკო დუმარჩქალაფარ დო
შურიშ აწმაკინალი ენერგია, ეფშა ხვამათინ…
მა აბსურდო მიმოჩქუდჷ
თეს მითინ მომირჩქილუანდუნ თინა,
მარა იშენით ბწანდჷ. მოკოდჷ ბწანდუკონ.
მუ ბწანდჷ?
კოჩიქ სატანას ქოდოვუჭყი დღანება –
მუშო გოკო თეზმა ჩქიმ წვალება,
დასურო დო ვარ, სიხოლო მუს მოიღანს
ჩქიმ შურიშ ჭიროთი, მიმაშქვი ბედინერებაშა -მაქ.
უკულ ჩქიმ ნარაგადშე ძიცაქ გამწომიტირხჷ, ისტერიკულქ…

მი მიგეხვარებჷ სი დო მუშენ ოკო მიგეხვარას,
მუჟამც ათე მერქას, ათე წუნს, მიდგარენს
ავარია მუთმოხვადჷ დო მუმაწკუმა ართო მითმოღურუ ჩქიჩქუ
ჟირ თუთერი, პიცდიობჟაუმნუსქირაფუნ?!
მუშენ ოკო მიგეხვარას ღორონთქ სი,
მუჟამც მილიონობათ კოჩის დიხაუჩას
ქობალიშ ფუჩხა ვაპალუ დო შქირენს ღურუნ?..

მუს თხულენდი,
შურიშ ჭუაშ მოლექინაფას
დო სქანი გურიშ ნადველიშ ეჸონაფასო?
მუ დუდიშიობა რე!

მა ხე ავოღი ხვამას დო აბსურდიშ გინაფაქ
ქუგომიდოხოდჷ ჩქიმ ასა-გასაშ ირ კუნთხუ დო განს…
ჩქიმ გურიშ ინოხ ქიდიბჭყი ზნახი დო ხვეწა სქან მეხ-
სი მირსხი დო მიმეხვარი, სი გინმოტე-მაქ…
ჩილამურეფი თოლეფშე დირფაშ ოფუნაფალ
ბეჸეშ სვირშე მოკარკალერ რახიცალო მოსირანდჷ…
გიძახუდი, გიძახუდი მუსხი ხანს –
ვადოპილა დო მირსხი,
ვადოპილა დო მირსხი -მაქ…

სი ე შვანო ნორჩალს წკურუმია სერს ალუჯანუდი ხასჷლას
დო შურო ვაიჩქუდჷ ჩქიმ გურს გორჩქინელ დაჩხირიშ მუთუნ…

ჰალამო, გოლი დო გეგშგაკურცხინჷ,
გიჯინ-მიჯინი, დიხაშ ნწალუაქ მოხვადუნ ფირქენდი ბრელ ხანს.
მარა ენა ხომ აშ ვა რდჷ.
დიადიახას თეშით ხოლო ველუფაჩუაფჷ ჸუჯიშა
ჩქიმ გურიშ ჭუა…

მუქუთ მოხვადუნ თინა რდჷ, ნამდა ჩქიმ უდიდაშ კორინქ,
სი ქიმმეხვარიკო დო ვა ბდინაფუდიკონ,
არზეფიშ ატომეფით ქიმერთჷ სქანდა დო გეგშგოკურციხინუ,
სით მიდაიღი ლური დო სვანჯი…

უკულ ჩქინ ენერგიეფიშ ვიბრაციაქ ართიანს გაკოხვადჷ დო
ჟირხოლოს გურქ დო შურქ დემერჩქალეს, ქიბგინით ართმაჟია,
ფერაფის დო ჯუნას ქიმებრულაფუდეს ართიანშა…

* * *

girl-skipping

დუდს გლახათ ქიბგინანქ დო
ხათე ბჟაშა გიმიბრულექ გალე.
თიშ ჩხორიეფს ქიმუჭოფუანქ გურს დო
დიბრძღუქ ჟინ ორთაშე გიმაჭვალირ ენერგიათინ,
ნამართვა მექანიკურ მონწყილობაშნერო
ვაფჩენდუქ უკულ თელ დღას…

მუჟამც ბჟა ვარენ, შურიშ ხუთუა მიღჷ
დო მა-ხუთუ შური –
შურ დინაფილო,
შურ წიკვილო,
შურ წაულირო,
შურ მალაფო,
შურ ნტებულო გინმიფრთუქ…
ჩქიმ თოლეფშე ნაბურღაშნერო ეშმიგორგოთ
წურწუფამ ჩილამურეფი დო ტყვეპე მარქვალიშ
შურ გუმანთხანს ასა-გასას…

ხვალე ართის შეულებჷ თე ბჟაშ თირუა
დო სი რექ თინა!
ჩქიმ შურიშ ლეცერი,
ჩქიმ ზღუაშ დო ოკიანეშ პოპორეფიშ დო
კოსმიურ, უგუთებუ ენერგია,
ჩქიმ შურიშ აკმანწყუალი,
ჩქიმ შურიშ ემაპონალი დო
ღარჯილიშ მუმაკათინაფალი…

ქაწირინე თოლშა დო
თე ირფელიშ მიდმღალარ ხოლო სი რექ!..
სი რექ ინით დო იანით!..

ხვალე თინა ბაღჷ
სარეკლამო ბანერიშ ტექსტიშე
ართი ასო გეშებკითხა სქან ჯოხოს
აკმუხვადუნ ფერ დო
გურიშ ბათქალიშ რიტმი ჟიროშეჩის
მუკმულუანს…

პინგ-პონგის მოლაჸაფჷ ხიოლ დო ჭუა…

გიშაკერზაფილო ოშქურანჯი მაფჷ გურშო,
მუჟამც ჟირხოლო წორო პუნთუნ…

დღას ვადომშქირტათ, ჩქიმ ბჟალეფი!..